Poetry Archives
@ eMule.com
      
advanced
tips
   
 Poetry » Classic Poets » Robert Burns »
 Bonnie Lesley
 E-Mail  Printable View

Bonnie Lesley
by Robert Burns

O saw ye bonnie Lesley
As she gaed o'er the Border?
She 's gane, like Alexander,
To spread her conquests farther.

To see her is to love her,
And love but her for ever;
For Nature made her what she is,
And ne'er made sic anither!

Thou art a queen, fair Lesley,
Thy subjects we, before thee:
Thou art divine, fair Lesley,
The hearts o' men adore thee.

The Deil he couldna scaith thee,
Or aught that wad belang thee;
He'd look into thy bonnie face
And say, 'I canna wrang thee!'

The Powers aboon will tent thee,
Misfortune sha'na steer thee:
Thou'rt like themsel' sae lovely,
That ill they'll ne'er let near thee.

Return again, fair Lesley,
Return to Caledonie!
That we may brag we hae a lass
There 's nane again sae bonnie!